ပန်းချီကား

ပန်းချီကားတွေကို သဘောကျပါသလား…။

အများစုက သဘောကျတယ်လို့ဖြေကြမှာပါ…။

ဘာလို့သဘောကျတာလဲဆိုရင်ရော…. ။

လှလို့ .. စုတ်ချက်ကောင်းလို့… အရောင်စပ်ထားတာ ကောင်းလို့ ….တကယ့်အစစ်အမှန်တစ်ခုလို ခံစားရလို့ … ရသ တစ်ခုခုပေးနိုင်လို့ … ဖြေစရာတွေ အများကြီး...။

ဒါဆို … ပန်းချီကားတွေကို ကြည့်တတ်တယ်ပေါ့နော်…။

“ ကြည့်ကားကြည့်၏ … သို့သော် ..မမြင်ပါ ” ဆိုတဲ့ လူတွေများ တပုံကြီး…။

ထားပါတော့လေ … မြင်တာမမြင်တာ …နားလည်ခံစားနိုင်စွမ်းရှိတာ မရှိတာတွေ ဆန်းစစ်မနေတော့ပါဘူး…. ။

နှစ်သက်လက်ခံတယ်ဆိုရင်ပဲ ပန်းချီကားတွေက ပြုံးနေတတ်ပါတယ်…(ပန်းချီဆရာကတော့ ပြုံးချင်မှ ပြုံးမှာ…)။

ကိုယ်နေတဲ့နေရာလေး… ဒါမှမဟုတ်… ကိုယ် ကျင်လည်နေတဲ့ ပတ်ဝန်းကျင်မှာ ပန်းချီကားလေးတွေကို မြင်နေရရင် ဘယ်လိုများနေမလဲ…။

ခံစားမှုတစ်ခုခုတော့ ပေးစွမ်းနေမှာ သေချာပါတယ်…။

ပန်းချီကား တချို က ဂုဏ်တက်စေမယ် … စိတ်အေးချမ်းစေမယ်… စိတ်ပျော်ရွှင်စေမယ်… သိမ့်မွေ့တဲ့ ချစ်ခြင်းမေတ္တာတွေကို လှုပ်နှိုးပေးလိမ့်မယ်….

တချို က စိတ်ကိုကြမ်းတမ်းလာစေမယ်… စိတ်ရိုင်းတွေကို နိုးဆွပေးမယ် … ရူးသွပ်သွားနိုင်လောက်တဲ့ ပန်းချီကားတွေလည်းရှိလိမ့်မယ်…

အမျိုးမျိုး ယူဆလို့ရတဲ့ …ခန့်မှန်းရခက်တဲ့ အတွေးတွေကို ပွားထွက်လာစေတဲ့ ပန်းချီကားတွေ လည်းရှိလိမ့်မယ်…။

သေချာတာကတော့ ကိုယ့်ပတ်ဝန်းကျင်မှာ ပန်းချီကားတစ်ချပ်ရှိနေခြင်းဟာ အဓိပ္ပါယ်တစ်ခုခုရှိနေမယ် … ရသ တစ်ခုခု ပေးနေမယ်ဆိုတဲ့ အချက်ပဲ…။

အခန်းနံရံမှာ ပန်းချီကား ချိတ်ဆွဲထားဖို့ လူတိုင်း နှစ်သက်စိတ်ဝင်စားကြမှာပါ။

ဘာလို့လဲဆိုတော့ လူဖြစ်နေလို့ပါဘဲ …။ လူဆိုတာ ခံစားတတ် …သာယာတတ်တဲ့ သတ္တ၀ါဖြစ်နေလို့ပါပဲ…။



ဒါပေမယ့် ၀မ်းနည်းစရာ ကောင်းတာကရှင်….

( တချို့..တချို့တွေကလွဲရင် ) လူတွေကလေ….သူတို့တွေကလေ… ပန်းချီကားတွေကို တန်ဖိုးကြီးကြီးပေးပြီး မ၀ယ်ချင်ကြဘူး….တဲ့ ။



လက်ဆောင်ရတဲ့ ပန်းချီကားကို ၀မ်းသာအားရချိတ်ဆွဲတတ်ကြပေမယ့်…. အလကားနီပါးရတဲ့ ပန်းချီကားကို ပျော်ပျော်ရွှင်ရွှင် ချိတ်ဆွဲကြပေမယ့် …

ဈေးပေါပေါနဲ့ ရလာတဲ့ ပန်းချီကားကို မြတ်မြတ်နိုးနိုး ချိတ်ဆွဲတတ်ကြပေမယ့် …

စားလို့မရ..၀တ်လို့မရ … စီးပွားရေးတစ်ခုအတွက် ကြီးမားတဲ့ အရင်းအနှီးတစ်ခုလည်းမဟုတ်တဲ့ ပန်းချီကားတစ်ချပ်အတွက် တန်ဖိုးကြီးကြီး ပေးဆပ်ရတော့မယ်ဆိုရင်တော့ အလွန်အမင်း တွန့်ဆုတ် တွေဝေသွားတတ်ကြပါတယ်….။ ။



“တချို့ ယောက်ျားတွေကလေ… တချို့မိန်းမတွေကလေ … ဘ၀ကို အဓိပ္ပါယ်ရှိစေမယ့် လက်တွဲဖော်တွေကို လက်တွဲဖို့အတွက် … ကိုယ့်ယုံကြည်ချက် … ပတ်ဝန်းကျင် …အသိုင်းအ၀ိုင်း… အချိန် … လွပ်လပ်မှုတွေကို ပေးဆပ်လိုက်ရမှာ တွန့်ဆုတ်တွေဝေနေကြတယ် …” လို့ ပန်းချီကားတစ်ချပ်က တိုးတိုးလေး လာပြောသွားတယ်…။ ။